गेम ओभर

बादल आफ्ना परिवारसँग सानो सहरको घरको भुइँतलामा बस्दै आएको छ। उनको जीवन सामान्यजस्तै देखिन्छ। तर, एकदिन उनले आफु एउटा अनौठो खेल भित्र रहेको पत्ता लगाउँछन्, जसले उनको दिमागलाई पूर्ण रूपमा नियन्त्रणमा लिन्छ। सुरूमा यो खेल सामान्य लाग्छ, तर चाँडै नै यो खेल एउटा डरलाग्दो फन्दामा बदलिन्छ।

खेलमा धेरै स्तर रहेका छन्, र हरेक स्तर अघिल्लोभन्दा गाह्रो। कुनै पनि स्तर समयमा पूरा गर्न नसके, खेलमा सहभागी व्यक्तिको बलि दिइनेछ ।

बादलको समूहमा अपरिचित अनुहारहरूसँगै केही परिचित मानिसहरू पनि छन्। बादलको समूहलाई नै ती बलिहरूको व्यवस्थापनको जिम्मा दिएको छ । उक्त बलि को कार्यक्रम बादल बसेको घरको माथिल्लो हुने गर्थ्यो ।

उसले यो सपना हो की विपना छुट्ट्याउन सकिरहेको हुदैन । खेलको उद्देश्य र यसको नियमको अर्थ के हो भन्ने कुरामा उनी शंका गर्न थाल्छन्। तर, यो प्रश्नहरूको खेल होइन। खेलमा अघि बढ्ने एकमात्र बाटो भनेको हरेक स्तर पूरा गर्नु हो।

डर र तनावले ग्रस्त भए पनि, बादल बाँकी स्तरहरू पार गर्छन्। खेल हरेक चरणमा अझ भयावह बन्दै जान्छ। वास्तविकता र कल्पनाको सिमाना हराउदै जान्छ।

उसले यो खेलबाट मुक्त पाउने उपाय भेट्टाउछन् । त्यसको लागि स्पिन गर्नु पर्ने हुन्छ । ३ पटक मौका पाइन्छ र त्यसमा मुक्त हुने अवस्था आएमा यो खेल बाट मुक्त हुन सकिन्छ । बादलले एक पटक पाङ्ग्रा घुमाए, तर असफल भए। यदि उनले फेरि घुमाएनन् भने, उनले सबै स्तरहरू पूरा गर्न सक्दैनथे, र आफु मुक्त हुने कुनै मौका हुँदैनथ्यो। तर, स्पिन नगरे, जीवनभर यो भयावह संसारमा थुनिनेछन्।

उनी सोच्न थाले, यदि मैले तीनै पटक घुमाएँ भने, म भाग्यमानी हुन सक्छु। यस सोचका साथ उनले जोखिम लिने निर्णय गरे। उनले फेरि घुमाए, तर भाग्यले साथ दिएन। डरले उनलाई पक्रियो, र उनले आफ्नो हात टाउकोमा राखे। आफूलाई थाहा नपाई, उनी भुइँमा थचक्क बसे। उनीलाई थाहा छ कि यो अन्तिम मौका हो।

तिनपटक स्पिन गर्छन्। हरेकपटक असफल। अब, बादलसँग कुनै विकल्प बाँकी थिएन। उनको मृत्युको समय आइसकेको थियो।

तीनपटक असफल भएपछि, बादलले आफ्नो भाग्यलाई स्वीकार्छन्। उनी आफ्नो अन्तिम क्षण परिवारसँग बिताउन चाहन्छन्। गहिरो मनमा उनी आफ्नो मृत्युको प्रतीक्षा गरिरहेका छन्।

दुई दिनपछि, रातको अँध्यारोमा, ढोका चर्र… गर्दै खुल्छ। एउटा विशाल आकृति, यमराजको जस्तो डरलाग्दो पोशाकमा, उसको अगाडी देखा पर्छ ।

बादल बलिको लागि तयार भएर अगाडि बढ्छन्। तर,.....

अचानक, उनको कोठामा रहेको स्क्रिनखुल्छ। स्क्रिनमा एउटा नयाँ स्तर देखिन्छ:

"विश्वासघात।"

सन्देश देखिन्छ:

"अन्तिम मौका। सबैलाई बचाउन एकजनालाई हटाउनुहोस्।"

बादल आफ्नो मनभित्रको डर र द्वन्द्वसँग जुध्छन्। उनलाई थाहा छ—यो नियम मान्नु भनेको आफ्नैको विरुद्ध जानु हो। तर, खेलको टाइमर घट्दै जान्छ। स्क्रिनमा फेरि अर्को चेतावनी देखिन्छ:

"इन्कारले सबैलाई समाप्त गर्नेछ।"

उनी स्क्रिन बन्द गर्न रिमोटको बटन थिच्छन्। स्क्रिन अचानक अँध्यारो हुन्छ। चर्को चिच्याहट घरभित्र गुञ्जिन्छ।

बादल दौडिएर जान्छन्। परिवार सबैजना बसिरहेको छ। तर सबैको आँखामा डर छ। खेलको कन्सोल अब बादलको हातमा छ, र त्यो रगतले लतपतिएको छ।

ढोकामा एकचोटि फेरि आवाज आउँछ। उक्त विशाल आकृति भएको व्यक्ति भित्र छिर्छ। तर, यो समय उनी बादलतिर इशारा गर्छ।

स्क्रिन फेरि चम्किन्छ, र अन्तिम सन्देश प्रकट हुन्छ:

"तपाईंको खेल पूरा भयो।"

उनि राहतको श्वास लिन खोज्छन । तर, राहत लामो समय टिक्दैन। स्क्रिन फेरि चम्किन्छ। अब त्यसमा लेखिएको छ:

"हरेक बलि दिने व्यक्ति कुनै समय खेलाडी थियो। अब तपाईंलाई नयाँ भूमिकामा स्वागत छ।"

बादलको शरीर बिस्तारै-बिस्तारै बलि दिने व्यक्तिको पोशाकले ढाक्न थाल्छ। उनी यो खेलको अर्को घातक पात्र बन्दै जान्छन्।